Møsvatn

Møsvatn er ein innsjø i Vinje (og ein liten del i Tinn) kommune, Telemark fylke. Sjøen har ei uregelmessig form med tre armar. Største lengd er om lag 40 kilometer. Møsvatn er eit etter norske tilhøve grunt fjellvatn; største djupn som er målt, er 45 meter. Møsvatns hovudtilløp Kvenna kjem frå fleire vatn på den sørvestlege delen av Hardangervidda. Sjøen har avløp gjennom Måne til Tinnsjå.

I 1904 byrja reguleringa av Møsvatn, som er det største magasinet for kraftverka ovanfor Rjukan. Det blir regulert mellom 918,5 og 900 meter over havet. Sjøarealet kan derfor variere sterkt; frå 78 kvadratkilometer til 80,9 kvadratkilometer. Møsvatn er den største innsjøen i Telemark.

Møsvatn er Noregs fjerde største reguleringsmagasin med eit energiinnhald som svarer til om lag 2300 GWh. Nedbørfeltet er på 1 500 kvadratkilometer, og det kan lagrast 1 064 millionar kubikkmeter vatn.

Det ligg ein del gardsbruk spreidd rundt vatnet; her finn ein nokre av dei høgastliggande gardane i landet. Møsstrond kyrkje ligg etter reguleringa på ei øy i Møsvatnet. Det er motorbåtrute med M/B Fjellvåken II mellom Skinnarbu i sørenden og Mogen i nordenden i sommarsesongen. Riksveg 37 på søraustsida knyter saman Rauland med Rjukan.

Namnet kan ha samanheng med elvenavnet Måne.