Faktaboks

Ole Bull Akademiet
Offisielt namn
STIFTELSEN OLE BULL AKADEMIET
Organisasjonstype
Stiftelse
Forretningsadresse
Voss
Dagleg leiar
Jo Asgeir Lie
Styreleiar
Terje Støve

Ole Bull Akademiet er ein utdanningsinstitusjon på Voss som formidlar og gir kunnskap om norsk folkemusikk og folkedans til studentar på høgskule- og universitetsnivå.

Ole Bull Akademiet vart skipa på Voss i 1977. Tankane om eit slikt akademi var gamle, Ole Bull tok alt i 1860-åra til orde for at det skulle skipast eit akademi som bygde på nasjonale element i musikk og dans. Felespelaren Sigbjørn Bernhoft Osa henta fram att desse tankane i 1970-åra. Osa var drivkrafta bak skipinga og var leiar den første tida.

Akademiet har frå 1977 halde vekelange kurs for musikkonservatorium og høgskular frå heile landet. Her får studentane ei innføring i norsk folkemusikk, med lærarar som høyrer med blant dei fremste utøvarane i landet. Frå 1996 har akademiet samarbeidd med Griegakademiet ved Universitetet i Bergen om eit toårig studium i folkemusikk, og frå 2004 vart det råd å ta bachelor. Sidan 2009 har Ole Bull Akademiet og Griegakademiet saman med tre andre utdanningsinstitusjonar tilbydd master i nordisk folkemusikk. Frå 2020 tilbyr også Ole Bull Akademiet master i folkemusikk som del av masterstudiet i utøvande musikk ved Griegakademiet

Ole Bull Akademiet var heilt frå skipinga nært knytt til Kringsjå Pensjonat på Voss. I 1994 kjøpte akademiet Kringsjå, som dei seinare har utvida med mellom anna fleire undervisingsrom og ein konsertsal.

Kurshaldarane ved akademiet har heile tida vore av dei fremste folkemusikarane i landet, mellom anna Agnes Buen Garnås, Hans W. Brimi og Berit Opheim.

Ole Bull Akademiet eig Osafestivalen AS, som blir drifta i samarbeid med lag og organisasjonar på Voss.

Les meir i Store norske leksikon

Eksterne lenker

Litteratur

  • Jostein Mæland: Ervesylvet. Folkemusikksoga for Vossabygdene. Voss 1991
  • Gunnar Stubseid: Frå spelemannslære til akademi. Bergen 1991

Faktaboks

Ole Bull Akademiet
Sektorkode
7000 Ideelle organisasjoner
Næringskode(r)
85.522 Undervisning i kunstfag; 90.011 Utøvende kunstnere og underholdningsvirksomhet innen musikk

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg